E heikli Sach
Diä einde schwäre uf d Wundermaschin „Thermomix“. Des isch so es Kuchimaschin, wu üssiht wiä e altbaches Raumschiff. Aber mit dere Wundermaschin dei alles ums Rumlöege fertig si: Suppe, Salate, Iis, Gulasch un weiß de Deifel noch alles. Ich stell mr des eso vor: Dr wirfsch e halbs Rindvieh, e baar Ziwele un Paprika oben ni, schittsch Briäji druf, drucksch uf e Knepfli – fertig isch de Gulasch.
Also wänn ich Gulasch mach, isch des ebbis ganz anders. Erscht emol löeg ich mr de Fetze Fleisch a, wu mr de Metzger gäh het – kennt besser si, s isch zimlig gädrig. Des Rumgschnipfel isch wirklich e unappeditligi Aglägeheit. Un wu ich do so am rumnägse bin, goht mr durch de Kopf, was ich noch alles mache möeß. S Leergöet furt bringe, zöem Zahnarzt goh un Faszietraining mache. Des ischs! Des weiß doch hitzedag jeder, dass gmeidigi Faszie s A un s O firs Wohlbefinde sin, fir s Vieh un d Konsumenten in dem Fall au. Also d Viehbüre kennte doch Faszierolle in de Ställ verdeile, wu s Fleisch vu d Viächer gmeidig macht. Mr brüchtig halt e Trainer defir. Villicht kennte d Krankekasseverbänd und de BLHV (Badischer Landwirtschaftlicher Hauptverband) sich jo d Koschte teile.
Irgendwänn emol hab ich diä verkläbte Faszie vum Fleisch abgnofert un fang a mit em Gulasch koche. Wänn ich jetz e Thermomix hätt, dät ich alles ebe obe ni werfe un ufs Knepfli drucke. Aber was dät mir do alles an Sinneserfahrunge entgoh. De Duft vu abaijte Ziwele, wiä s schmeckt, wenn d Ziwele verbrennt sin, wil eber agröefe het un dü nimmi dra denkt hesch, dass dr ebbis uf em Herd hesch. Un wer kennt en nit, de Duft, de Gstank vu gschmolzenem Plaschtik uf de Herdplatte. Abkiähle loh, göet lufte un de Cerankratzer rüshole. Deswäge hab ich mr jetz so Niroschtaschissili kauft, wiä in de Kochshows. Do döe ich alles scheen vorbereite – s brücht au si Zit – un fang deno a z brutzle. S Tablet mit em Youtube-Video stoht denäbe. Natirlig nit uf de Herdplatte.
Aber manchmol bassiärts noch, do iberkunnt s mich: Ich löeg was im Kiählschrank so rumstoht un lit un fang eifach a z brutztle, ohni Schissili un ohni Youtube-Videos. Meischtens schmeckts.
Adjee mitenand
saits Rénate
Em Rénate si Blog . . . 