E eltere Beitrag, jetz als Video. Fir so ebbis het mr jo jetz Zit, vor allem bi däm Dreckwetter – sitter meh wiä sechs Monet Winter!
S Vereinsläbe schlooft immer noch, vili sin drürig, d Lit fähle ne aber au d Bewegung. S isch aber nit alles scheen gsi.
Dass mi Hochzitskleid im Lumpesack g’landet isch, het e Vorgschicht.
Mi Mann isch uf em Sofa glääge un het sich üsgröeht. Des derf er jo bi dere Arbet, de ganz Daag am Herd. Er schwätzt zwar als vu zwelf Stunde, do möeß er sich irgendwiä verrechnet ha. Zeh Stunde isch er als furt, des hab ich gnau noochgrechnet, zwelf Stunde basse do bim beschte Wille nit ni. Aber isch egal, miäd isch mer au, wämmer acht Stunde in de Kuchi gstande isch.
Also wiä er do so glääge isch, un de bludd Büch üsem T-Schört glöegt het, hab ich denkt, do lit e gstrandete Wal un isch des nit eins vu de neje Schörts, in 2 mol XL?
Schatz, dü bisch z glai, hab ich zöe nem gsait, ganz diplomatisch. Hä, er un glai, er sei doch e göete Kopf greßer wiä ich, wiä groß sott er denn noch si? So ungfähr zwei Meter fuffzeh, bi dinem Gwicht, isch mini röehig un sachlig Antwort gsi.
S isch eweng gange, bis er der Brocke gschluckt gha het. Deno isch er pletzlig ufgstande, zimlig gschmeidig un glenkig fir si dreistelligs Gwicht un het ebbis vu Keller ufrüume gschwätzt! Dass ich des noch erläbe derf, er rüümt der Keller uf! Nooch drei Minüte isch er wider obe gsi, s Liächt sei kabütt un er heb kei bassendi Biire. So, So!
Der Brocke mit em Verhältnis zwische Gwicht un Greßi isch em bim Gang in de Keller aber schins wider hochkumme un er het e alte, dumme Witz g‘risse: Er isch zöe mer kumme, het mich in d Fettrellili uf em Buckel pfätzt un gfrogt, ob mer mol wider scheen esse giänge, er ziägt au sini Hochzitskravatt aa, diä basst em noch un ich kennt jo mi Hochzitskleid aziäge, wänns mer noch basst – ha, ha, ha, het er iber si eige Witz glacht un sich uf d Schenkl gklopft.
Ich hab nämlig zöe de Hochzit kei langs wißes Kleid agha, sondern e blaugriän schangschierends, rohsidenes Etuikleid un hab minem Mann üs de Reschtli e Kravatt schnidere lo. Loß der Witz stecke, hab ich gsait, der isch alt wiä de Wald, diä Kleider sin furt, s Kleid un d Kravatt au. D Motte sin dra gsi. Fresse un gfresse were, so isch des. De Rüp macht d Siide un d Motte frisst si, hab ich minem Mann erklärt. Er hets gfresse.
Kei einzigs Lechli isch dinne gsi, aber mir isch diä Pfätzerei un der Witz uf de Senkl gange.
S Kleid hät mer sowiäso niä meh basst un mi Mann ziägt jo au keini Kravatte aa, do soll sich ebber andersch dra erfreje. Äs sin jo zitlosi Sache gsi.
Adjee mitenand
saits Rénate
Noch ebbis isch in de Lumpesack kumme. Beinah hätt ich d Unterhose vergesse, viär fascht neji Unterhose. Ich hab si nit verliide kenne. Ich bin halt nit Generation String. Diä Unterhose hän nämlig ins Arschgräbli zooge.
Ich bin jo bi de Gesamtversammlung vum Sportverein gsi Vereinsläbe, e Erfahrung fir alli Sinne, wu ich des Zirkeltraining mach. Des hebe si welle ufgäh un ebbis anders, moderners abiäte, so hän si gsait. Zöem Noochläse: Vereinsläbe, e Erfahrung fir alli Sinne
Deswäge hab ich mer schu e Wiili iberlejt, ob ich nit doch noch anderi Aagebote vum Verein alöege sott. Yoga un Zumba hab ich denkt, des kenntsch jo emol üsprobiäre. Des Yoga isch jo so e Art Glicksbringer, heißt s, un Zumba sei prima fir d Fitness un der merksch gar nit, dass der dich aastrengsch, sage si. Des heert sich doch göet aa! Also bin ich zum Zumba gange. Latinomüsik, technomäßig ufgmischt, e Traineri, wu schins diä göet Lüne mit Schepfleffel gfresse het un lütter hoch motivierti un mindeschtens genauso saumäßig göet g‘lünte Fraue um mich rum. Ich mach mich doch nit zöem Affe un wackel e Stund lang mit em Fidle un wink mit de Erm wiä e Dubel. Bal hab ich eso döe, wiä wenn ich mer de Föeß verknackst heb un bin gange. Keini zeh Minüte hets brücht bis ich gwisst hab, was ich nit will: Z U M B A!
Also hab ich mini ganz Hoffnung ufs Yoga glajt.
Im Vereinsheftli isch gstande, dass mer si eigini bequämi Matte mitbringe sott, wenn s goht. Ich hab kei Turnmatte, nur e bequämi Matratze, aber diä kann ich nit mitnämme in de Stroßebahn. Do hab ich miner Mann gfrogt, ob bi däm ganze Campingzigs wu ner bstellt het, au e Isomatte debi isch. Wu ich em z Wihnächte nämlig e Zelt gschenkt hab So e Bescherung!, het er sini Üsrüschtung ufgrüschtet, aber nit üspackt. Si kait einem au nit uf de Kopf wiä s ander Campingzigs, wämmer in de Keller kunnt, sondern hegschtens uf d Fiäß, wil er diä ganze Pakete gli wämmer in de Keller nikunnt uf diä rächt Sitte gstellt het. He nai, e Isomatte brüchtigt er nit, er nimmt unsri alt Luftmatratze mit em Blöememuschter, do heb er immer göet druf gschloofe. Er schu, ich nit, mich hets immer glupft, wenn er sich umdrillt het. Soll er emol löege, wiä ner diä 1,20 Meter breit Luftmatratze in des fimfeniinzig Zentimeter breit Wurfzelt ni kriägt. Säll isch mir grad egal, ich wir nit debi si.
Pletzlig het er gmeint, dass er mir vum Gschäft, also vu de Wirtschaft, dass er mir vu dert e Kissi mitbringe kennt, so eins, wu si als d Biärfässer bi de Alieferung druf plotze leen. S heb au e Griff, sodass mers trage kennt. Ich hab em erklärt, dass ich nit e Kissi brüch un schu gar keins wu nooch drissig Johr Biärkeller stinkt.
Ich weiß nit wurum, aber irgendwiä het er mir helfe welle un het noch e Vorschlag brocht. Mi Mann isch schu e Käpsili!
Er kennt d Nochbere froge. Er het in de Weschkuchi gsähne (was macht denn der in de Weschkuchi?), dass si do so e Matte unter de Weschmaschine lige hän, dass diä nit umenanderspaziärt. Er dät d Wäschmaschine au lupfe un ich miäßt d Matte nur rüsziäge.
Un au des hab ich nit welle. Ich will doch kei Matte üsem Keller un z glai isch si doch au, 80 Zentimeter im Quadrat. Ob des fir so e Zwuggl wiä mich nit lange dät, het mit Mann gmeint. Het der denkt, dass mer bim Yoga eifach e Stund im Schnidersitz wiä e Buddha do hockt, brummt un summt un in sich ni horcht. Jawoll, genau des het er denkt.
Artig hab ich mich binem fir sovil ungwohnti Firsorg bedankt, hab mer aber denkt: der isch nit ibel verrisse, dass er meint, sini Frau macht Gymnaschtik uf eme alte Dreckfegge.
Ich hab mer kenne e Matte lehne. Wiäs Yoga gsi isch un was üs em Program firs neje Sportlerjohr wore isch, e ander Mol.
Adjee mitenand
saits Rénate
Also s Zumba isch nit fir mich gsi, deswäge bin ich zöem Yoga.
Alli schwärme vum Yoga, der wirsch glenkig, innerlig röehig un sportlig isch s au no.
S Matteproblem het sich in de Turnhalle gleest. Ich hab mer eini üsleene kenne. Fir alli Fäll hab ich aber e Deppig un e Badtöech debi gha. Dicki Wullsocke au. Selber gstrickti, nit vu mir, sondern noch vu de Oma.
Diä jung Yogalehreri het uns alli frejndlig begriäßt, au diä isch granatemäßig göet druf gsi. Do isch jo nit debi, wämmer positiv isch.
Mir hän uns eweng gstreckt un greckt am Aafang, d Lehreri het des alles imme beröhigende Sing-Sang erklärt. Dass si üsem Fränkische isch, het si nit sage miäße, des het mer gheert. Brust rein, Brust raus. Viär rollendi „R“ hinterenander, wiä schafft diä des bloß? Vor lütter Erfurcht vor sovil Sprochakrobatik hab ich natirlig nit ufbasst un fascht alles falsch gmacht. Aber s rollend „R“ isch nit s einzig gsi, was mich abglenkt het. D Socke hän bisse! S Hocke im Schnidersitz het mer nit nur im Kriz weh döe, sphärischi Panflötemüsik (au als Fahrstöehlmüsik bekannt) het mich schu immer uf d Palme brocht und deno noch lütter bled grinsendi Wiber um mich rum. Wurum döesch der des aa? Wil der fit bliibe willsch oder meinsch, dass ders möesch.
Aber jetz? Zumba isch nit, Yoga haltsch au nit üs, was machsch, wenn si wirklig s Zirkeltraining ufgänn?
Des hab ich nit gwißt, aber liäber kei Sport un nur spaziäre laufe.
Zruck zöe döem Probeyoga. So e Stund kann lang wäre. Nomol de Föeß verknackse goht nit, mir sin jo nur ghockt un glääge un s sin jo au e baar vum Zumbakurs do gsi.
E Krampf in de Wade, des isch es! Ich hab mer d Wade massiert un dodebi s Gsicht verzooge, heinomol döet des weh, het mi Gsichtsüsdruck gsait! D Fränkin het des gli gsähne un mitfiählend gmeint, dass des halt leider vilmols in de Wechseljohr vorkunnt. Aber im negschte Johr gäbs Hormonyoga, speziell fir Fraue wiä mich. Oh, des isch jo subbr, hab ich gheuchelt un deno ebbis vuneme Krampf, ganz inne im Bei verzellt un bin üs de Turnhalle ghumplt.
Bi de Gesamtversammlung vum Sportverein isch s am End eso rüskumme.
Also, s Zirkeltraining gits widerschd. S Zumba gits nimmi un Yoga gits defir zweimol, eimol fir jeder un jedi un eimol fir Fraue in de Wechseljohr, s Hormonyoga – s. o. …
Wenn ich ehrlig bin, hab ich mich eweng gfrejt, dass es kei Zumba meh git. Ich weiß, dass Schadefrejd kei göete Charakterzöeg isch, aber ich bin halt eifach ehrlig un Ehrligkeit dittet doch uf e göete Charakter hi, oder nit?
Adjee mitenand
saits Rénate
Noch bis vor eme göete Johr hän Verein iberhaupt kei Rolle in minem Läbe gspiilt un pletzlig bin ich mittedrin. Bim Schaffe un au in de Freizit, wil miner Sport wu ich mach, s Zirkeltraining, jo au imme Verein isch.
– Wiäso Zirkeltraining? des erfahre ner im erschte Video vum Rénate sinem Blog –
Wiä s bi de Iibringer un Engagierer bim Schaffe zöegoht Schaffe goh – bineme Verein hab ich nejig erfahre. So, un jetz kann ichs mit ere Sportlerversammlung vergliche. S isch Johreshauptversammlung fir alli interessierte Mitglieder gsi.
Eigentlig wär ich do nit higange, wil eso arg hets mich nit interessiert, was alles botte isch, wer wäm Dankscheen sait un wiäviel dezöekumme un wegzooge sin. Ich bin nur higange, wil ich s litte heere hab, dass sie d Gruppe vum Zirkeltraining ufleese wänn un dodefir ebbis moderners abiäte wänn, ebbis was grad aagsait isch. Zumba kanns nit sii, des gits schu, des isch quasi kalte Kaffee. Cross dich fit oder Kettleball, dodevu hän si s gha.
Also bin ich amme wunderscheene Junidaag, am freje Obend in d Turnhalle gange, wu d Versammlung gsi isch.
In de Halle sin d Turnbänk ufgstellt gsi, sonigi wu mer in der Schöel het miäße driber hopse. Un diä Maidli, wu fir de Schwebebalke z dabbig gsi sin, hän Pferdchenspring uf däne Bänk mache miäße un als Abgang e Strecksprung. Meischtens sin si aber rabplotzt wiä Herdepfelsäck. Ich hab dertemol mini ganzi Angscht iiberwindet un bin uf em herte Schwebebalke rumghepperlet un däppelet mit zämme kniffenem Mül, aber zöe de unsportlige Pfludde un Stigele hab ich nit ghäre welle. Des isch aber lang rum, wahrschins kennt ich jetz nit emol meh uf de Bank rumdäppele ohni rab z kaie.
Also diä Gesamtversammlung isch, wiä schu gsait, amme scheene, sunnige Juniobend gsi, kei einzigs Welkli hesch am Himmel gsähne. Wurum an soneme Daag diä ganz Föeßballjugend de ganze Nommittag in de Halle trainiäre möeß, weiß de Kuckkuck. Villicht wägem Ozon – des wird s gsi si!
Vu de zweie bis am fimfi hän nochenander d E-Jugend, d D-Jugend un am Schluß d C-Jugend trainiärt. In de Luft isch also e ganz bsunders Gmisch, mer kennt au firnähm sage, e Geruchsportpourri ghängt. Üs em Föeßschweiß vu de Gingl vu de E-Jugend un em unkontrollierte Achselschweiß vu de Kerli, wu grad mitte in de Pubertät sin, also de D-Jugend, abgrundet vu de Üsdinschtunge vu de C-Jugend. Do hets au nix gholfe, dass diä mit e Hüffe Deo rum gsulveret hän. Un vu de vier Oberliächter in de Halle sin drei nit uf gange, des isch leider schu e Wiili eso.
Mich hets fascht gstellt, wu ich in d Halle ni kumme bin. Des derf doch nit wohr si! Un deno noch diä herte Bänk ohni Lähni. Nooch ere halbe Stund schu, hab ich denkt, dass mers Kritz abbricht. Deswäge bin ich in de Geräteraum gschliche un hab e Bock rüsgschunde un en an d Hallewand gstellt, so dass ich mich hab kenne aalähne.
S isch ännewäg zimlig langwilig gsi. Gegesitigi Beweihräucherung ghärt schiints zöem Vereinsläbe dezöe. Un deno, ei Abteilig noch de andere het e Rapport abgliferet. Rhetorisch zwische mäßig un saumäßig. D Sportler hän jo ihri Stärke anderschwu. Des merksch jo als au, wänn si d Föeßballer interviewe. S Schlimmscht isch aber gsi, dass es nooch em Alphabet gange isch, also vu A bis Z. Wu isch s Zirkeltraining? Fascht am End, hinterher kunnt nur noch Zumba.
Wiä s deno rüskumme isch, möeß ich e ander mol loswäre, ich möeß jetz erscht emol durchschnüüfe.
Adjee mitenand
saits Rénate
Diesen Beitrag hören:
Em Rénate si Blog . . . 