Kategorie: Säll un des

Bussi Bussi, wäm’s gfallt

Batschändli gäh – de ursprünglig Titel

Si hän jo rüsgfunde, dass s Schlimmscht diä Aerosole sin bi de Ibertragung vu dere Kranket. Deswäge derft mr jetz wider enander d Hand gäh, wämmer wott. Aber will mr des jetz wider? D Händ vu wildfremde Lit alange? E manchs mol hesch doch als schu denkt, s lit dr ebber e tote Fisch in d Hand – kalt, bätschnass un labrig. Des Vergniäge kannsch jetz wider ha. Un nit nur des. Mr kann sich jetz au wider alle meglige halbfremde Lit an de Hals werfe: Bussi rechts-links oder rechts-links-rechts. Au säll goht wider.

Dr sihsch es aber nimmi, Shaking hands un s Bussiere. Hän s d Lit no nit gspannt? Träue si sich no nit? Hän si vergesse, wiä s goht? Ich hab do emol e glaini – natirlig nit repräsentativi – Umfrog gstartet, ganz spontan in de Umkleidekabine vum Sport. Sechs simmer gsi, fimfi hän zöegäh, dass ene nit fählt, im Gegeteil. Des isch aber e Blitzumfrog unter weibliche Persone gsi, wiä gsait, nit repräsentativ. Aber froge doch emol so umenand – oder villicht kennt sich do emol e seriöses Institut demit befasse.

Also ich wär als Kind uf jeder Fall froh gsi, wenn ich nit immer hät miäße s Batschhändli gäh un mich irgendwelchi Verwandte druckt hätte, dass ich fascht kei Luft meh kriägt hab.

Alla göet, de Elleboge döets doch au, s isch halt eweng lächterlig, uf jeder Fall meischtens aber nit bätschnass.

Adjee mitenand

sait s Rénate

Gedanke vu vorgeschtern –

Schnee vu geschtern

S goht wide los – wenn macht was dicht? Spannung lit iber em ditsche Ländli.

Wil nit nur Wihnächte stoht vor de Dire, de negscht Lockdown bumperet au schu dra.

Dr weisch schu, dass dr diä negscht Zit wider vil deheim rumhocke wirsch. Nit nur d Wihnachtsmärkt, au d Wirtschafte, d Kinos un d Theater, alli were si dicht mache (miäße). Eh, wiäs wohl mit em Föeßball widergoht?

Mr weiß es halt no nit, wiä heißts so scheen, nix gnaus weiß mr.

Eweng grüst mr jo. Wihnächte, d Büdi voll, de liäbe lange Dag nur koche, esse, ufrüme un de Verdauungsspaziergang isch s gsellschaftlige Highlight, wil dr do villicht ebber bekannts iber de Wäg dappt, mit däm dr deno zämme eweng rumjomere kannsch. Deno wider heim, uf soviel frischi Luft kriägsch e mords Kohldampf. Raclette goht immer, het mr hitzedag vu Oktober bis März au immer im Hüs. Aber nit nur säll hab ich do. D Kuchischränk sin voller Nüdle, teilwis noch üs de letschte Versorgungskrise, wu deno doch keini wore isch. Un im Keller hämmer jetz e Plätzli freigschüfelt fir e Notration Klopapier – fuffzig Rolle sotte firs erscht lange, au wenn diä ganz Familie d Schisserei het.

Adjee mitenand

saits Rénate

%d Bloggern gefällt das: